1974 بقرية بن يونس قرب سبتة تزاد منير الرماش كانت عندو جوج جنسيات المغربية و الإسبانية عاش وسط أسرة فقيرة و فحي مهمش و للأسف مكملش قرايتو لظروفه المادية فاش وصل 12السنة مشا لمدينة تطوان باش يخدم اول حجا بدا بيها هي تهريب السجائر من سبتة و كيبيعها فمدن شمال المغرب ستمر فيها سنوات فاش وصل 17السنة تشد و تحكم عليه 10اشهر سجن بسبب الاعتداء على مهرب منافس له .

ولكن الحبس مخلاهش ارجع اللور بالعكس هو كان عندو هدف ضروري يحققو هو يدير الفلوس كان الحلم ديالو هو يدخل عالم الثراء بسرعة من بعد التهريب و بيع الديطاي مبقاش مقنعو تعرف على بزناسة وولا كيبيع الحشيش حتى هو بكمية قليلة الزبناء ديالو ولا كيتعرف على هاد العالم أكثر مع كان شاب ذكي و عندو رغبة كبيرة باش ادير الفلوس و مكيعرفش الخوف ولا كيزيد اتعمق كثر و دخل العب الكبير و دخل الترويج المخدرات من خلال واحد الشبكة كان الرئيس ديالها بارون المخدرات المشهور بونقوب الملقب بالديب هنا فاش خدا خبرة كثر و تعلم حوايج بزاف مكانش عارفهوم و دار بلاصتو و فهاد الوقيتة لكان منير بدأ كيتعرف فهاد الوسط المظلم .

 الديب تعتاقل بالضبط في سنة 1996 عتاقلوه فواحد الحملة كانت نايضة هاديك الوقيتة مقاومة تجارة المخدرات بين شمال المغرب و جنوب اسبانيا منير فهاد الفترة لقا الفرصة ديالو ووسع الشبكة ديالو و سيطر على بعض المناطق لي كان مسيطر عليها الديب و من هنا تشهر الاسم ديال منير الرماش وولا من الأباطرة باولو اسكوبار المغرب توسعات الشبكة ديالو مزيان من السجائر إلى الحشيش، ومن الفلوكة البطوات الكبار مسافرين الأوروبا و فيهم الممنوعات 

في ظرف سنوات قليلة، رجع الاسم ديالو كيُتهمَس بيه فالمقاهي والموانئ:و نجح الرماش فتوسيع النشاط ديالو مدة طويلة بدون محاسبة حيت كان محمي من مسؤولين كبار وكان كيلعب بالفلوس لعب ولاو عندو نفوذ فيلات و حراس شخصيين و كان كيخسر الملاين وكون ثروة كبيرة رجع ملياردير و كيتعامل مع مسؤولين كبار و فنفس الوقت كان محبوب وسط الناس خصوصا الفقراء كان كيساعد الناس لمفحالهوش و كيوقف مع اي واحد محتاج ليه كان طيب بزاف على حساب اقوال الناس لتعاملو معاه ولكن حتى حجا مكدوم حيت منير تعتاقل فالاخير و كفما منير طلع طلعة وحدة نزل نزلة وحدة شنو وقع ؟

كثرات الأقاويل و القصص على هاد القضية و على حسب اقوال بعض الناس قالوا منير كان خارج هو الصديقة ديالو الهولندية بالضبط فكورنيش مرينا سمير بمدينة تطوان شوية واحد جوج أشخاص بقاو كيستفزوه وناض خلاف بيناتهم من بعد جبد الفردي و تيرا فيهم بجوج وكان المصير ديالهم مستودع الأموات و فهديك الوقيتة كان الملك كيقضي العطلة ديالو فقصر كفيرا بمدينة تطوان و القرطاس تسمع و تعطات أوامر باش اتبحث فالموضوع وكان هذا سبب باش تعتاقل منير و ستغلو الفرصة الاعداء ديالو و تجبدو الضوصة ديالو و كاينة رواية خرى منير كانت عندو ايقامة بمارينا بمدينة تطوان قرب الإقامة الملكية واحد نهار كان خارج باليخت ديالو و دخل المنطقة محظورة و ممنوعة هادشي لخلا الحراس اوقفوه و حققو معاه وقاليهم انا رجل اعمال من بعد هاد القضية منير وقع ليه مشكيل مع واحد جوج أشخاص لخلاه يتعصب و طلق النار قرب القصر الملكي و تعطات تعليمات باش اتعتاقل منير الرماش و تحقق معاه المهم قصص بزاف رواوهم الناس على كيفية و سبب الاعتقال و من بعد تحقيقات طويلة تجبدو الضواصا كاملين ديال منير فيهم المخدرات فيهم التهريب فيهم الرشوة و تجبدو معاه ريوس كبار و تم الحكم عليه سنة 2003 ب 20عام سجن نافذة بتهمة تكوين عصابة لترويج المخدرات امتد نشاطها داخل المغرب و خارجه و توجهات ليه عدة تهم مختلفة دازت ايام و شهور وكمل العقوبة السجنية ديالو وخرج سنة منير الرماش سنة 2016  

كاين لكيقول أن منير ميستهلش هاد العقوبة كاملة حيت كان كيساعد الفقراء و كان محبوب بين الناس وكان انسان مأدب وكاين لكيقول الحكم كان عادل لانه دار جريمة و هي الاتجار بالمخدرات لضيعو الشباب و خرجوا على عقلهم و صحتهم بهاد السم لكان كيتاجر بيه